सिद्धेश्वर एक्सप्रेसमधील सोने चोरी प्रकरण..

• सिद्धेश्वर एक्सप्रेसमधील सोने चोरी प्रकरण..
• ६ महिन्यांनंतर ४ आरोपी जेरबंद., १.६२ कोटींचे सोने जप्त..

कल्याण : सिद्धेश्वर एक्सप्रेसमधून ५.४ कोटी रुपयांचे सोने चोरी झाल्याच्या घटनेला ६ महिने उलटल्यानंतर कल्याण जीआरपीच्या गुन्हे शाखेला मोठे यश मिळाले आहे. आंतरराज्यीय चोरट्यांच्या टोळीतील ४ जणांना अटक करून पोलिसांनी १.६२ कोटी रुपये किमतीचे सोने जप्त केले आहे. डिसेंबर २०२५ मध्ये मुंबईतील सराफ व्यावसायिक अभयकुमार मदनलाल जैन (५२) व त्यांची मुलगी तनिष्का सोलापूरहून दागिन्यांचा व्यवसाय आटोपून मुंबईला परतत होते. ते ४.७ किलो वजनाचे सोन्याचे दागिने ट्रॉली बॅगेत ठेवून सिद्धेश्वर एक्सप्रेसच्या एसी कोचमधून प्रवास करत होते. बॅग सीटखाली साखळीने बांधून कुलूप लावले होते. सकाळी उठल्यावर दोन्ही बॅगा गायब असल्याचे लक्षात आले. तोपर्यंत ट्रेन कल्याणला पोहोचली होती. कल्याण स्थानकावर उतरून अभय जैन यांनी जीआरपीत तक्रार दाखल केली. जीआरपी आयुक्त एम. राकेश कलासागर यांच्या आदेशानुसार गुन्हे शाखेचे वरिष्ठ निरीक्षक विजय खेडकर यांच्या नेतृत्वाखाली विशेष पथक तयार करण्यात आले. पथकाने सोलापूर-कल्याण मार्गावरील स्थानकांचे सीसीटीव्ही फुटेज तपासले व गुप्त माहिती गोळा केली. तपासात सोलापूर जिल्ह्यात सक्रिय असलेल्या टोळीचा सुगावा लागला. महिनोंच्या पाळत व अनेक गावांमध्ये छापेमारीनंतर पोलिसांनी रमेश बाळू डिकोले, फुलचंद उर्फ परमेश्वर उर्फ सरपंच छगन गुंजाळ, धनराज उर्फ धनंजय उर्फ धन्या साहेबराव गुंजाळ, पुणेकर उर्फ शिवण्या सीताराम डिकोले या ४ आरोपींना अटक केली.चौकशीत समोर आले की ओळख पटू नये म्हणून चोरीच्या दागिन्यांना वितळवून सोन्याच्या बिस्किटांमध्ये रूपांतर करण्यात आले होते. पोलिसांनी सुमारे १.१ किलो वजनाच्या तीन सोन्याच्या बिस्किटा जप्त केल्या. त्यांची बाजारातील किंमत १.६२ कोटी रुपये आहे. गुन्हे शाखेचे वरिष्ठ निरीक्षक विजय खेडकर यांनी सांगितले की या प्रकरणातील ६ आरोपी अजूनही फरार असून त्यांना पकडण्यासाठी शोध सुरू आहे ।